A primeira sesión de control no Parlamento galego tras as eleccións do 10-N marcou o pistoletazo de saída oficial da campaña electoral para as autonómicas de 2020. Porque pese ao empeño inicial de Luís Villares (este mércores tocoulle quenda de pregunta ao grupo mixto en substitución do BNG) e Antón Sánchez de abordar cuestións como a política tributaria ou o rural, o duelo Feijóo-Caballero en clave electoral acabou capitalizando a sesión.
Basicamente, o presidente da Xunta afeoulle ao PSOE a "tomadura de pelo" do pacto de Goberno en 48 horas con Unidas Podemos tras seis meses de insultos "e reproches" entre eles e unhas eleccións polo medio. "Penso que isto vai rematar mal, pero non puido empezar peor", dixo un Feijóo que ve perigar as plantas de Ence e Endesa co futuro Executivo estatal. "Onte [polo martes] vostedes asinaron dúas cousas: Un goberno de España que non sabemos cantos meses durará e non gobernar Galicia durante moitos anos", recalcou.
Enfronte, Gonzalo Caballero xustificou os pactos estatais para "evitar que Casado e a ultradereita" dirixan o país, defendeu a "centralidade" que representa o PSOE e deu por finiquitada a era Feijóo despois de que o 10-N "un 54% dos galegos apostasen polas forzas de esquerdas"; o mesmo apoio, recordou, que en abril.
Feijóo, a Caballero sobre a marcha de Leiceaga: "Perde o mellor deputado que ten. Sabe que pasa? Que lle estorban os que saben máis que vostede"
Co runrún de fondo xa en ambas as bancadas e a tensión á alza, Feijóo pechou a súa quenda elevando o ton do seu ataque ao líder socialista, ao que aconsellou ser "humilde na vitoria" pero, sobre todo, non ser "soberbio na derrota", xa que resulta "patético". E aproveitou para despedir con todas as honras a Xoaquín Fernández Leiceaga, que se marcha ao Senado. E fíxoo con recado incluído para Caballero: "Vostede perde o mellor deputado que ten. Sabe que pasa? Que lle estorban os que saben máis que vostede", espetou. "O meu respecto e admiración e o deste grupo ao señor Leiceaga. Moito máis que a vostede", concluíu Feijóo.
TRIBUTOS E RURAL. Antes, Feijóo defendera a súa política de rebaixas fiscais fronte a un grupo mixto que lle afeou que lle baixe os tributos aos ricos "para comprar vivendas na praia". Para Luís Villares resulta inconcibible que a Xunta perdoe diñeiro "aos 6.000 galegos máis ricos" co imposto de Patrimonio mentres en Galicia un 23% dos galegos están en risco de pobreza ou faltan medios sanitarios. E Antón Sánchez, do Grupo Común de Esquerda, censurou a política rural da Xunta na "década negra" de Feijóo, caracterizada, dixo, "por entregarlle a terra e o vento" ás empresas.
Feijóo, pola súa banda, afeou a falta de propostas da esquerda rupturista en materia rural, xa que no recente debate do estado da autonomía "rexeitou" todas as propostas de mellora do rural e non achegou ningunha nos seus 40 proposicións. Ademais, avanzou que seguirán avanzando nos procesos de concentración de terra e parcelarias e na política de impostos cero no campo.
