O rei Felipe VI visitou este martes a Catedral de Santiago para comprobar tanto o resultado das obras de restauración xa efectuadas como aquelas que faltan por concluír. á saída e tras contemplar o Pórtico da Gloria, o monarca asegurou que a gran obra do Mestre Mateo pareceulle "unha marabilla".
Durante o percorrido, Felipe VI estivo acompañado de distintas autoridades como o presidente da Xunta, Alberto Núñez Feijóo; a ministra de Facenda, María Jesús Montero; o delegado do Goberno en Galicia, Javier Losada; o alcalde compostelán, Martiño Noriega; o presidente do Parlamento galego, Miguel Ángel Santalices; e o arcebispo de Santiago, Julián Barrio.
A visita deu comezo sobre o mediodía, momento no que o arquitecto director das obras de restauración ofreceulles "unha análise de como fora o proceso de rehabilitación e o que quedaba por facer", explicou o rexedor compostelán en declaracións aos medios á súa saída da Catedral.
A visita á Catedral durou ao redor de hora e media
É precisamente esta exposición do técnico "o que máis ocupou" da visita de Felipe VI, quen, segundo palabras de Noriega, "tiña bastante interese en coñecer que volume de obra quedaba e que prazos había".
Ademais, ao final do percorrido, o monarca mostrouse "impactado" polo Pórtico, segundo manifestouno o alcalde de Santiago. "Pero iso non atende a realezas nin á poboación civil. Eu creo que iso nos pasa a todos porque é unha obra espectacular", apuntou.
SUBIDA Á CUBERTA. A visita á Catedral durou ao redor de hora e media. Cara ás 13.00 horas, Felipe VI e o resto de autoridades subiron ás cubertas da Catedral, parte delas tapadas polas estadas correspondentes ás tarefas de restauración dos tellados que apuntan cara a Praza da Quintana.
Xa fóra, baixo a choiva e con coidado de non escorregar debido á humidade dos chanzos, o Rei continuou atento e riseiro á explicación do arquitecto, incluso expoñéndolle algunha pregunta ou dúbida que lle xurdía.
Unha vez alí realizaron a foto de familia, momento no que Feijóo chanceou coa prensa lamentándose de non dispor dun paraugas para protexerse da choiva. Cando volvían ao interior, o presidente da Xunta e a ministra de Facenda mantiñan unha pequena conversación cara á cola do grupo.
Feijóo chanceou coa prensa lamentándose de non dispor dun paraugas para protexerse da choiva
Tras iso, baixaron ao interior da igrexa para contemplar o Pórtico e logo saír polo portón que dá cara á Praza do Obradoiro. Ata alí achegáronse decenas de curiosos con paraugas e capuchas, que chegaron a exclamar "`Viva o Rei!" en varias ocasións.
Na tarde deste martes, A súa Maxestade desprazarase ata A Coruña para entregar un premio ao presidente de Portugal, Marcelo Rebelo de Sousa.
NOVO RÉXIME DE VISITAS AO PÓRTICO. Por outra banda, segundo informaron fontes da Catedral, o novo réxime de visitas ao Pórtico da Gloria –esta vez de pago, cun prezo ordinario de 10 euros– podería atrasarse ata decembro pola demora nas obras de rehabilitación no interior, que prevén o encapsulado da obra do Mestre Mateo para adecuar as condicións de humidade e temperatura.
