Un condutor que sufriu un accidente de tráfico este mércores saltou da ambulancia cando estaba a ser trasladado ao centro hospitalario en Ourense para recibir atención médica. Segundo os datos aos que tivo acceso Efe, aproveitou que o vehículo estaba detido nun semáforo en vermello para saír e, acto seguido, fuxiu á carreira pola beirarrúa.
O suceso tivo lugar ás catro e cuarto da tarde no ramal que comunica a saída 224 da autovía A-52 coa N- 525, no termo municipal de San Cibrao das Viñas. O condutor sufrira unha saída de vía co seu vehículo, que envorcou.
