A Fruga insta á Xunta a declarar como praga a presenza da velutina e do xabaril en Galicia
Considera que se deben de tomar "medidas drásticas" contra os "ataques masivos" destes animais
O coordinador en Lugo da Federación Rural Galega (Fruga), Elías Somoza, apremou á Xunta a activar a declaración de "praga" pola presenza da avispa velutina e do xabaril "con ataques masivos" ao agro galego.
Somoza incide en que en toda a comunidade "están a producirse ataques masivos do xabaril, autorízanse batidas pero aínda así non é suficiente" para erradicalo. "A poboación (deste animal) está a ir en aumento e vaias por onde vaias ves pasteiros levantados e agora van empezar os ataques ao millo antes de recollelo", alerta.
"A Xunta sempre mirou para outro lado e non lle interesa. Os ataques son masivos e dificultan a actividade agraria"
O dirixente agrario chama a atención sobre "a gravidade" deste problema, polo que invitou á Administración autonómica a que tome "medidas drásticas", entre as que se inclúe a declaración de "praga". "A Xunta sempre mirou para outro lado e non lle interesa. Os ataques son masivos e dificultan a actividade agraria", censurou.
Tamén esixiu ao Goberno galego que faga o mesmo, active a declaración de praga, coa presenza da avispa velutina, que se estende por toda a Comunidade.
Elías Somoza afeou que, con respecto a combater esta especie invasora, "a Xunta está a mirar para outro lado", instando o Goberno presidido por Alberto Núñez Feijóo a que se tome isto "en serio".