A borrasca Gabriel, que mantén en alerta laranxa o litoral de Lugo e A Coruña, deixou un refacho de vento de 146 quilómetros por hora en Estaca de Bares, no municipio coruñés de Mañón e limítrofe coa Mariña.
Segundo os datos da Aemet, o cabo máis setentrional de Galicia rexistrou unha velocidade media "significativa" de 103 quilómetros por hora. Outros puntos nos que soprou o vento con forza, neste caso segundo as medicións de Meteogalicia, foron Cedeira, con 120,3 quilómetros por hora, ou Viveiro, con 109,7 km/ h.
En Galicia hai avisos por vento e fenómenos costeiros ata este mércores por un temporal de vento e mar asociado á borrasca Gabriel. Ademais, a cota de neve baixará ata os 1.100 metros nas zonas de montaña.
O vento tamén deixou refachos significativos noutras localidades con altitude menor de 900 metros como Cariño (A Coruña), con 105,3 quilómetros por hora; o 91,1 km/ h no municipio coruñés de Malpica, e os 83,8 en Vimianzo (A Coruña). Pola súa banda, en zonas con altitude maior de 900 metros o vento alcanzou os 95,2 quilómetros por hora na localidade de montaña de Manzaneda (Ourense) ás 7,20 horas, os 80,1 en Carballeda de Valdeorras (Ourense) ás 8.10 horas e os 78,6 en Baleira (Lugo) ás 10.20 horas.
A Dirección Xeral de Emerxencias e Interior da Vicepresidencia da Xunta alertou dun temporal costeiro de nivel laranxa nas provincias da Coruña e Lugo ata este mércores.
