Unha galega dá a luz no salón da súa casa tras recibir a alta no hospital
Unha muller natural de Ribeira asegura que deu a luz no salón da súa casa xusto logo de recibir a alta médica, e anuncia que posiblemente denuncie os feitos por se fosen constitutivos dun delito por neglixencia médica.
Os feitos sucederon o pasado venres, 6 de novembro, pola mañá, cando a muller, Andrea Vila, atopouse mal e empezou a ter contraccións, polo que acudiu ao servizo de urxencias do Hospital do Barbanza, contou este domingo a propia afectada en declaracións a Efe.
“O maior está con pesadelos; viu tanto sangue que pensaba que ía a morrer”
A pesar de que estaba embarazada de 38 semanas, atendeuna unha xinecóloga que lle dixo que "aínda non estaba dilatada" e que chegou a reprocharlle que "parecía mentira que tendo xa dous nenos non soubese diferenciar as contraccións", asegura a afectada.
"Déronme a alta sobre as once e cuarto, cheguei a casa e ao intre dei a luz no salón”, relata Andrea Vila, que afirma que necesitou a axuda da súa nai, que nese momento se atopaban na súa casa coidando dos seus outros dous fillos, mentres o seu marido estaba a traballar.
"Erik naceu en dous empuxóns"
A muller conta que "en dous empuxóns" naceu Erik, pero lamenta que "o peor" é que os seus dous nenos pequenos “viron todo”. "O maior está con pesadelos; viu tanto sangue que pensaba que ía a morrer", explica.
Logo de dar a luz, a muller regresou ao hospital e di que narrou o ocorrido pero que non lle deron explicación algunha, subliña.
Andrea Vila anunciou que este luns se vai a pór en contacto cun avogado especializado en neglixencias médicas para comentarlle o caso e estudar unha posible demanda.
“O neno agora ten que quedar ingresado un mínimo de sete días e con antibióticos", sinala esta nai, que recoñece estar preocupada pola saúde do seu fillo.