Galicia afiánzase como unha das comunidades máis seguras de España. Así o reflicte o Balance de Criminalidade feito público este venres polo Ministerio do Interior que, no entanto, recolle un incremento no número de delitos perpetrados no primeiro semestre na comunidade con respecto ao mesmo período do ano pasado. En concreto, a estatística reflexa que se cometeron 36.595 infraccións penais entre xaneiro e xuño, fronte ás 35.832 rexistradas un ano antes (un 2,1% máis), o que sitúa a taxa de criminalidade en 27,7 delitos por cada mil habitantes.
Como aspecto positivo cabe destacar que se reduciron de forma ostensible os casos máis graves, como os homicidios dolosos e asasinatos consumados, que pasaron de 8 a 4. Na mesma liña, os intentos infrutuosos de acabar coa vida de alguén —en grao de tentativa— caeron de 16 a 9. Ademais, cometéronse 9.331 furtos, 5.055 roubos con forza e 2.241 delitos contra a seguridade viaria.
PROVINCIAS. No que respecta ás provincias, as catro mantéñense por baixo da taxa nacional de criminalidade, aínda que aumenta lixeiramente en todas menos en Pontevedra, onde descende en 0,6 puntos con respecto á primeira metade do ano pasado. Na de Lugo o repunte foi tímido, ao elevarse o cociente de delitos ata as 21,1 infraccións penais por cada mil habitantes, cunha subida de 0,2 puntos respecto ao ano pasado. Deste xeito, mantense como a máis segura das catro provincias galegas, cun total de 3.403 infraccións penais coñecidas neste semestre.
No polo oposto, a provincia da Coruña mostra a peor porcentaxe (30,4 infraccións penais por cada mil habitantes), seguida de Pontevedra, que a pesar da melloría ocupa o seguinte banzo no ranking autonómico. No seu caso a taxa de criminalidade descende e sitúase en 28 infraccións penais por cada mil habitantes, o que significan 0,6 puntos menos que nas mesmas datas do ano pasado. Do mesmo xeito, as infraccións penais baixaron con respecto a 2017, ata as 12.773.
