Galicia dotarase dun plan de voluntariado centrado no Xacobeo
A iniciativa contará con varios obxectivos, empezando por fomentar a relación intergeneracional entre voluntarios novos e maiores
O presidente do Goberno galego, Alberto Núñez Feijóo, avanzou este mércores que Galicia se dotará dun Plan de voluntariado centrado no Xacobeo 2021.
Tras o Consello da Xunta, o presidente galego avanzou que esta iniciativa contará con varios obxectivos, empezando por fomentar a relación interxeracional entre voluntarios novos e maiores; apoiar na información aos peregrinos; e difundir o patrimonio cultural galego entre os visitantes.
Tamén apostará por reforzar o coidado ambiental nas rutas; xerar espazos de intercambio cultural entre os mozos de distintos lugares de Europa; impulsar a formación para as persoas voluntarias; aproveitar o Xacobeo 2021 como "expositor do valor da acción voluntaria" e consolidar Galicia como "a comunidade máis solidaria de España".
Na súa intervención, o presidente resaltou que, na actualidade, Galicia conta con 1.053 entidades de acción voluntaria rexistradas e 44.658 voluntarios que participan nas súas actividades.
Entre as medidas, aludiu ao programa de voluntariado sénior, que busca que os maiores de 55 anos participen activamente na acción voluntaria e ao programa de voluntariado xuvenil, destinado a mozos de entre 16 e 30 anos.
Tamén a potenciación do voluntariado educativo, a continuación do Programa Voluntariado no Camiño, a organización de campos de voluntariado vinculados ao Camiño de Santiago ou ao proxecto de voluntariado europeo dentro do Xacobeo 2021 chamado 'Xacobeando'.