Galicia, baixo a influencia das altas presións

Este sábado Galicia estará baixo a influencia das altas presións con presenza de aire frío nas capas altas da atmosfera.

Esta situación traerá unha xornada de ceos pouco nubrados ou despexados en xeral, con formación de nubes de evolución durante a tarde que poderán xerar chuvascos tormentosos máis probables no interior e en áreas de montaña.

Pola noite haberá brumas costeiras.

As temperaturas mínimas e máximas experimentarán un lixeiro ascenso. Os ventos soprarán de compoñente norte frouxos en xeral, con intervalos moderados entre Bares e Fisterra.