Máis dun milleiro de persoas contaxiáronse nas últimas horas en Galicia

Máis dun milleiro de persoas contaxiáronse nas últimas horas de coronavirus en Galicia, lixeiramente por baixo das cifras dos últimos días, e hai tamén un lixeiro descenso da presión hospitalaria, aínda que houbo oito falecidos por covid-19, segundo o balance diario da Xunta.

Segundo os datos recompilados ás 18:00 horas do luns, en Galicia había 1.041 novos contaxiados, o que eleva a 16.253 o número total de persoas con infección activa.

Delas hai 233 hospitalizadas en camas illadas, oito menos que un día antes, e outras 50 graves en terapia intensiva, unha menos que a xornada anterior.

Case a metade dos infectados atópanse entre Vigo e Pontevedra, onde se rexistra a maior presión hospitalaria.

Desde o inicio da epidemia contaxiáronse en Galicia 210.779 persoas, das que se recuperaron 191.837 e faleceron 2.730, oito delas notificadas nas últimas horas.