Galicia segue sumando casos activos e supera xa o millar
O número de casos activos de coronavirus en Galicia segue en aumento e supera xa o milleiro, ao situarse en 1.053 tras sumar 115 este venres. Crecen en case todas as áreas sanitarias —coa única excepción de Santiago— e 618 corresponden á da Coruña e Cee, 74 máis que a xornada pasada.
O balance publicado este venres pola Consellería de Sanidade reflicte tamén que 42 persoas están ingresadas en unidades de hospitalización convencional —dúas máis que o xoves— e que xa non hai pacientes en unidades de coidados intensivos. O resto dos infectados, 1.011, están en seguimento domiciliario.
Por áreas sanitarias, 618 casos corresponden á da Coruña e Cee (74 máis que este xoves); 99 á de Lugo (seis máis); 134 á de Vigo (16 máis); 52 á de Pontevedra-O Salnés (un máis); 73 á de Ourense (13 máis); 42 á de Santiago (un menos), e 35 á de Ferrol (seis máis).
Ata o momento, curáronse en Galicia 11.527 persoas —21 máis que a xornada anterior—, e faleceron 623 pacientes con Covid. A última vítima mortal notificada, este xoves, é un home de 90 anos falecido en Ourense relacionado cun brote en Vilar de Barrio.
Dos 1.053 casos activos na comunidade, dous están vinculados a centros residenciais, e afectan a dous profesionais.
O número de PCR realizadas ata agora en Galicia ascende a 274.812, fronte ás 272.115 contabilizadas ata este xoves.