lunes. 26.10.2020 |
El tiempo
lunes. 26.10.2020
El tiempo

Galicia suma unha nova vítima mortal e 58 casos activos máis en 24 horas

Un test no Hospital da Mariña. ELISEO TRIGO
Un test no Hospital da Mariña. ELISEO TRIGO

Unha muller de 83 anos na Mariña, que presentaba patoloxías previas, converteuse este domingo na segunda vítima mortal do coronavirus en Galicia en tres días, tras dous meses sen falecidos por este virus. Segundo informa Sanidade, esta muller fora diagnosticada o 23 de xullo, cando ingresou no Hospital da Mariña, que agora queda sen pacientes con covid-19. O seu foi o último diagnóstico do brote que afectou á comarca.

Este falecemento chega nun día en que os contaxios en Galicia continúan a súa escalada. Se de venres a sábado aumentaron en 89 os casos activos, nas últimas 24 horas o crecemento foi algo máis contido pero igualmente preocupante: con 58 enfermos máis. O total, segundo o balance facilitado este domingo polo Sergas, é 591, fronte aos 533 do sábado.

REPUNTE EN GALICIA. Con esta morte, a comunidade suma desde o inicio da pandemia 621 falecidos. En canto aos contaxiados por áreas sanitarias, a máis afectada é de novo A Coruña, que este o sábado estreou as medidas restritivas en cinco municipios da área metropolitana da capital para intentar controlar o brote orixinado nun ximnasio de Arteixo. 

O número de casos activos nesta área elévase a 302, o que supón 56 máis que o sábado, e supón que nesta área concéntrense máis da metade dos casos de Galicia. 

Tras A Coruña, a área máis afectada é a de Vigo, con 83 casos (2 máis); á que seguen Lugo con 74 casos activos (5 menos), Pontevedra con 43 casos (1 menos), Santiago, 41 (1 máis), Ourense, 41 (4 máis) e Ferrol, 7 (1 máis). 

Dúas persoas están nas Uci (1 menos) e outras 23 en unidades convencionais de hospitalización (2 menos); mentres que o resto, 566, están nos seus domicilios. 

As autoridades sanitarias informan tamén de que xa se curaron 11.428 persoas, o que supón 25 máis que o sábado. . 

Deste dato e do de casos activos con respecto ao día anterior despréndese que o número de positivos na última xornada -dato que non ofrecen desagregado as autoridades sanitarias- é 83 novos contagios.

O número probas PCR acumulado elévase a 264.202, case dúas mil máis que o día anterior.  A Xunta indica tamén que hai tres usuarios contaxiados en residencias de maiores (dous máis que onte), nas que seguen contaxiados dous profesionais, segundo os datos facilitados. 

Galicia suma unha nova vítima mortal e 58 casos activos máis en 24...
comentarios