Galicia detectou por sexto día consecutivo máis de cen contaxios por coronavirus nas últimas 24 horas, exactamente 136, o mesmo número que un día antes. Así as cousas, e tras dúas semanas cos casos activos á alza, chega aos 1.285 infectados, 106 máis que o día anterior, nunha xornada na que a comunidade volve superar os 50 hospitalizados.
Segundo o Sergas, ata as 18.00 horas deste domingo había na comunidade 53 enfermos de covid-19 hospitalizados, nove deles en unidades de críticos, un menos que o día anterior, e 44 en planta, oito máis.
Desde o inicio da epidemia contaxiáronse en Galicia 184.502 persoas, das que se recuperaron 180.595 e faleceron 2.656, unha delas nas últimas horas.
Por áreas sanitarias, a da Coruña supera xa as 300 infeccións activas por coronavirus (317); a de Ourense está a punto (295) e a de Vigo supera as 200 (233) tras dobrar o número de afectados nunha semana, o mesmo incremento que se produciu na área de Lugo no mesmo tempo, que chega a 124 casos.