Un home de Tenerife de 44 anos converteuse este venres na sexta persoa que aínda necesita tratamento nun hospital tras o incendio dun catamarán turístico o pasado martes no Grove, que deixou 38 feridos.
O home xa fora atendido destas queimaduras de segundo grao pero ante o seu empeoramento acudiu ao punto de Atención Continuada de Vigo e foi trasladado á clínica Povisa, onde foi ingresado, indicaron a Efe fontes sanitarias.
Deste xeito son seis as persoas ingresadas en centros hospitalarios galegos con queimaduras de diversa consideración tras o incendio da embarcación.
Na unidade de queimados do Complexo Hospitalario Universitario da Coruña permanece estable, con queimaduras graves, o matrimonio de Guadalaxara de 68 e 70 anos. Ademais, na clínica Povisa, en Vigo, están ingresadas outras tres persoas con feridas graves.
Trátase dunha muller de Sevilla con queimaduras de primeiro e segundo grao, que evoluciona favorablemente e dun matrimonio de Mataró (Barcelona); un home con queimaduras de primeiro e segundo grao e unha muller con queimaduras de segundo grao que non presentan complicacións, segundo indicaron fontes sanitarias.
O incendio da embarcación turística, da que aínda se descoñece a súa causa e que a deixou completamente calcinada, deixou 38 persoas feridas das 52 que ían a bordo, entre turistas (48) e tripulación (4).