A CIG denunciou este martes "o silencio" da Consellería de Medio Rural e Mar, á que acusan de "falsear" os datos do incendio declarado o pasado domingo en Carballeda de Valdeorras (Ourense). Nun comunicado, esta central sindical criticou "o mutismo" dos responsables da Consellería de Medio Rural e Mar, entre a noite do domingo e boa parte do luns respecto do incendio forestal declarado neste municipio ourensán, nos montes de Pena Trevinca.
O departamento autonómico elevou a unhas 200 as hectáreas calcinadas, unha cifra que esta central sobe a "máis de 350", estando a súa maior parte "en zona protexida". Por este motivo, denuncian os sindicalistas da CIG "a ocultación" da Xunta dos datos deste incendio, sobre o cal a propia Consellería de Medio Rural "non fixo mención de ningún tipo" na súa páxina web ata que se extinguiu.
O sindicato considera o ocorrido "unha estratexia" a fin de tapar boa parte das hectáreas queimadas, polo que esixen xa a Medio Rural "que tome medidas para que non se cheguen a producir incendios forestais como o do pasado domingo en Pena Trevinca como consecuencia das competencias que en materia forestal ten a Xunta de Galicia".
Por outra banda, esixiron á Xunta que execute as obras encamiñadas á prevención dos incendios forestais a fin de diminuír os riscos de propagación dos incendios xunto cunha maior vixilancia, principalmente en zonas de reserva, tales como zonas de protección especial (ZPE) e zonas de especial conservación (ZEC).
A CIG acusa á Xunta de "falsear" os datos do incendio en Carballeda
A central sindical critica "o mutismo" dos responsables da Consellería de Medio Rural e Mar
