Pasou unha semana desde que o alcalde de Oleiros, Ángel García Seoane, asegurase en Facebook que a Policía Local actuaría "de inmediato" contra un local de intercambio de parellas que abriu a principios deste mes no municipio e aínda segue operando sen restricións.
O rexedor escribía que "en Santa Cristina abriron un local sen licenza nin autorización, que non ten cabida no Concello de Oleiros" e sentenciaba que non ían tolerar" establecementos deste tipo.
"Os que queiran intercambiar con outras parellas teñen que ir a outro municipio", aseveraba García Seoane na rede social, pero o certo é que o local segue aberto e funciona con normalidade.
Desde o establecemento, chamado Ludis A Coruña, trasladaron a Efe que non farían declaracións sobre este asunto para evitar entrar en polémicas.
Na súa web descríbese ao lugar como "un local íntimo e acolledor en cada un dos seus recunchos", con "preto de 200 metros destinados ao lecer e ao pracer" e establecen que permanece aberto xoves, venres, sábados e vésperas de festivos desde as 23.30 horas.
A empresa que o xestiona ten outro negocio das mesmas características na cidade de Vigo desde 2016 que funciona sen problemas.