Ramón Rieiro Couto, de 63 anos, desaparecido na Coruña desde o domingo, 10 de marzo, foi localizado en bo estado, segundo informa SOS Desaparecidos.
A Policía Local da Coruña solicitara a colaboración cidadá, a través das redes sociais, para localizar ao home desaparecido nesta cidade. Tamén o fixo SOS Desaparecidos, que, como a Policía facilitou datos sobre o home, do que non se tiñan noticias desde o domingo, día 10.
DESAPARECIDA EN FERROL. Persoal de corpos de urxencias e de seguridade renovou este martes na costa de Ferrol os labores de procura da muller de 57 anos de idade que permanece desaparecida desde o pasado domingo e ampliou o ámbito de actuación na franxa litoral do municipio.
Fontes do despregamento confirmaron que as tarefas se estenderon ata a contorna de cabo Prioriño desde o mediodía deste martes. No inicio dos labores, na mañá deste luns, o rastrexo limitouse á zona da parroquia de Doniños.
Foi nese punto, concretamente nas inmediacións dun local hostaleiro no enclave de Lume Boo, en Punta Penencia, onde un familiar atopou unha peza da desaparecida, veciña do barrio ferrolán de Caranza.
O despregamento retomouse con apoio de Salvamento Marítimo e en coincidencia coa marea de primeira hora da tarde.
Este suceso mobilizou a efectivos de Policía Nacional, Protección Civil e bombeiros de Ferrol, que acudiron con drones recentemente incorporados ao parque local para rastreos similares. Así mesmo, o helicóptero Helimer 401 apoia as tarefas realizadas desde terra.
A asociación galega de cans de salvamento Casaga sumouse a varios grupos con canes desde o comezo do operativo.
