Galicia rexistrou este martes as temperaturas máis altas correspondentes a un mes de setembro desde que hai rexistros, debido á entrada dunha masa de aire cálido procedente do norte de África que deixou un día de calor intensa.
O fenómeno, que afectou ás catro provincias, deixouse sentir máis nas de Pontevedra e en Ourense, pero tamén en varios puntos da Coruña e Lugo, e os termómetros movéronse entre os trinta e os corenta graos centígrados, aumentando a intensidade a medida que avanzou a xornada.
Os termómetros chegaron aos 41,6 graos en Ourense capital, mentres rozaron os 40 na comarca de Santiago, cos 39,5 alcanzados en Boqueixón e os 37,8 da propia capital galega. Así o recolle a web de Meteogalicia, con temperaturas rexistradas pasadas as 16.00 horas desta xornada de calor moi intensa para a época do ano.
Así, en localidades da provincia de Pontevedra como Fornelos de Montes chegouse aos 36,8 graos, mentres a máxima situouse ao redor dos 36 graos na capital do Lérez.
Igualmente, noutros puntos da provincia ourensá como Verín e Entrimo alcanzáronse os 37,8 e 37,6, respectivamente. Tamén na provincia de Lugo os termómetros rexistraron niveis inusualmente altos para estas datas, como os 38,3 graos de Bóveda e os 37,2 do Courel.
O de Galicia, que este mércores espera a entrada dunha borrasca débil, non foi o único caso, posto que o bochorno afectou a case todo o país.
As temperaturas máis altas dos últimos trinta anos e a escasa humidade deste "episodio meteorolóxico inusual" manteranse en España ata este mércores pola noite, cando se empece a notar unha melloría nos termómetros, informou o portavoz da Axencia Estatal de Meteoroloxía (Aemet), Modesto Sánchez.
As temperaturas, as máis altas das últimas tres décadas, empezarán a remitir "a partir deste mércores, polo oeste, por Galicia e Portugal", e "tanto as máximas e as mínimas suavizaranse e empezarase a notar unha melloría pola noite", asegurou.
Segundo a páxina web da Aemet, este mércores superáronse en 26 observatorios os extremos absolutos das series climatolóxicas correspondentes consideradas de toda a serie do mes de setembro a partir de 1920.
Os observatorios que superaron os 40 graos son: o aeroporto de Córdoba (45,1); no de Sevilla (44,8); no de Jerez de la Frontera (Cádiz) e Murcia (44,6), e Morón de la Frontera (Cádiz), con 44,4.
Tamén na Base aérea de Sumidero, Murcia, (43,6); Granada (42,7); Huelva Rolda Este (42,0); Tortosa, Tarragona, (41,4); Base Naval de Rota, en Cádiz (41); Cáceres (40,6) e Xaén (40,2).
