En Marea presentará unha moción nos municipios polos que discorre a AP-9 para que a concesionaria Audasa lle abone o 100 % do Ibi, fronte ao 5% que paga na actualidade en base a unha normativa de 1972.
O deputado de En Marea Marcos Cal e o portavoz de Marea de Vigo, Rubén Pérez, presentaron este venres esta moción, elaborada a partir dunha iniciativa súa que foi aprobada por unanimidade no Parlamento de Galicia o pasado 18 de xaneiro.
Cal avogou por acabar cun "copago" aos veciños dos municipios polos que discorre a AP-9, que ten unhas "tarifas elevadísimas mentres dá un servizo pésimo".
Unha "indecencia", abundou Cal, que "só se xustifica desde a conivencia político-empresarial e o neoliberalismo de amiguetes que empregan as institucións para o seu propio beneficio".
No caso concreto de Vigo, Rubén Pérez calculou que estaría a deixar de percibir case 173.000 euros de recadación do IBI.
Marcos Cal puxo de relevo que Audasa está a obter un 50 % de beneficios sobre facturación, cando a media das empresas de Galicia sitúase no 7 por cento.
Detallou que entre 1997 e 2003, a concesionaria da AP-9 recadou 2.344 millóns de euros en peaxes, cun beneficio bruto de 1.900 millóns de euros.
O deputado de En Marea contrapuxo estes datos co feito de que a AP-9, afirmou, leva cinco anos seguidos como a autoestrada con maior número de reclamacións, a que ten menos traballadores por quilómetro de vía e a que rexistra unha maior sinistralidade.
