As Meninas de Canido reunirán a 200 artistas en Ferrol toda a fin de semana

A organización da festa cultural das Meninas de Canido presentou este mércores os actos incluídos na súa décima edición, marcada pola recente aparición dunha obra atribuída a Banksy meses despois de ser invitado a participar neste proxecto, que reunirá a 200 artistas neste barrio de Ferrol entre o venres e o domingo próximos.

Na cita deste mércores estiveron presentes o alcalde de Ferrol, Jorge Suárez, e o secretario xeral de Cultura da Xunta, Anxo Lorenzo. Xunto a eles, firmas privadas mostraron o seu respaldo ao festexo.

A programación contempla a estancia dalgúns dos mellores muralistas de España, que compartirán con artistas populares o labor de recrear en estilo libre o espírito da soada obra de Velázquez en fachadas e espazos públicos da barriada.

Así, algúns dos pintores xa prevén comezar co seu traballo á primeira hora da mañá deste venres. A primeira xornada de actividades desenvolverase en puntos como o Baluarte de Canido ou as prazas da Tafona e A Auga.

Entre os invitados ás Meninas de Canido, figura o fotógrafo Alberto García-Alix, que liderará na tarde do venres e ao longo de todo o sábado unha clase maxistral. Igualmente, abriranse espazos para degustacións gastronómicas grazas a camionetas e levarán a cabo talleres de decoración.

Mentres, a parte musical cita nesa xornada aos cantantes Roger de Flor, Sergio Galego, Malditos Pendejos e Swinging Flamingos.

O día de inicio concluirá cunha proxección audiovisual a cargo dos fotógrafos Helena Segura Torrella, Antonio García Segura e Gosia Trebacz.

O grupo Ojos de Brujo, xunto a un picadiscos, amenizará a medianoite ao termo dos fogos artificiais cos que anualmente finalizan as festas de verán de Ferrol cada 31 de agosto.

Charlas, concertos, actuacións de danza ou unha acción vinculada coa poesía completarán a axenda do evento, que prevé congregar a miles de persoas no barrio alto ferrolán.