Un total de 24 provincias, entre elas as de Pontevedra e Ourense, estarán este mércores 29 de xullo en alerta por temperaturas máximas altas, que poderán alcanzar ou superar nalgúns casos os 40ºC, segundo a predición da Axencia Estatal de Meteoroloxía. Na cidade das Burgas está previsto que os termómetros cheguen a 39º, mentres que na Boa Vila estímase que non superarán os 33º, segundo Meteogalicia.
Galicia continuará con influencia das altas presións situadas entre Inglaterra e Francia, de forma que os ceos estarán despexados en xeral, con algunhas nubes baixas na primeira metade do día nas provincias da Coruña e Lugo, e con formación de nubes de evolución na provincia de Ourense que incluso poden deixar algún chuvasco illado de carácter tormentoso.
As temperaturas mínimas quedarán sen cambios significativos e as máximas experimentarán un moderado ascenso. O vento soprará do nordeste, máis intenso entre Fisterra e Estaca de Bares.
Así, nas grandes urbes galegas os termómetros oscilarán este mércores entre os 16 graos de mínima en Lugo e os 39 de máxima que se alcanzarán en Ourense.
ONDA DE CALOR. Unha onda de calor chegará este xoves á Península e Baleares, deixando temperaturas de 40ºC en amplas zonas ata polo menos o sábado, segundo o aviso especial emitido pola Aemet, o primeiro por este fenómeno emitido este verán. Na capital lucense está previsto que se alcancen os 36 graos, tres máis que en Compostela ou Ferrol (33º), mentres que en Ourense chegarase aos 40º. Máis moderadas serán as temperaturas en Pontevedra (29º) ou A Coruña (28º).
Tanto a Península como Baleares se atopan baixo a influencia dunha masa cálida de orixe africana que, unida á forte e prolongada insolación propia destas datas, dará lugar a unha situación de onda de calor nos próximos días, con máximos de temperaturas que irán variando en canto a distribución espacial segundo as datas polos lixeiros cambios de situación meteorolóxica que se vaian dando estes días.
Segundo indicou o portavoz da Aemet, Rubén del Campo, pode ser "rechamante" que ata a data non se emitiu ningún aviso especial, dado o carácter tan cálido do mes de xullo, Do Campo explica que ata a data non coincidiran os tres elementos necesarios de xeito simultáneo para poder falar dunha onda de calor. Estes elementos son: a activación de avisos laranxas (risco importante) ou vermellos (risco extremo), neste caso por altas temperaturas; en segundo lugar, que eses avisos se estendan a, polo menos un 10% da Península e Baleares ou ao 30% en Canarias; e que este período teña unha duración de polo menos 3 días dentro dun período de 4.
"Ata a data non coincidiran os tres elementos simultaneamente e, polo tanto, non se emitiu aviso especial", asegurou o portavoz. De feito, recorda que nalgunhas rexións, como Estremadura ou Andalucía, xa se superaron os limiares de onda de calor, especialmente polas altas temperaturas e pola duración ao longo do mes de xullo, "pero non fora unha extensión suficiente no conxunto de España como para emitir o aviso".
