O condutor dun camión perdeu a vida, segundo informou o 112, nun accidente de circulación que se produciu á primeira hora da tarde deste mércores na Autovía do Cantábrico (A-8), á altura do municipio lucense de Barreiros.
Segundo informaron a Efe fontes dos servizos de urxencias, o accidente produciuse por unha colisión entre dous camións e un deles transportaba gasóleo, o que provocou unha explosión e un incendio.
O accidente rexistrouse no quilómetro 527 da autovía, á altura da localidade de Celeiro de Mariñaos, e nese punto a estrada tivo que ser cortada en ambos os sentidos da circulación.
Nestes momentos, o incendio xa está controlado e, segundo informa o 112, non hai perigo para a poboación.
Para responder a esta urxencia, o 112 mobilizou ao 061, aos Bombeiros de Barreiros e Vilalba, ao GES de Cervo, a Protección Civil de Barreiros e a persoal de mantemento da autovía.