Morre un motorista de 35 anos tras chocar contra un coche en Salvaterra

Un motorista faleceu ás 22.00 horas deste sábado ao chocar cun coche na PO-404 ao seu paso por Salvaterra. En concreto, ocorreu no quilómetro 12, na parroquia de Cabreira, cando o turismo se incorporaba á estrada que une a localidade pontevedresa con Salceda.

A vítima é un veciño da zona de 35 anos, que faleceu no lugar do sinistro. No outro vehículo implicado viaxaban unha muller cunha menor.

Segundo informa o centro de atención ás urxencias, ademais dos profesionais do 061-Urxencias Sanitarias interviñeron tamén os Bombeiros do Baixo Miño ante a posibilidade de que o falecido estivese atrapado. Finalmente, comprobaron que estaba liberado e accesible, polo que non foi precisa a súa intervención.

Desde o 112 Galicia informouse tamén aos bombeiros de Ponteareas e aos axentes da Garda Civil de Tráfico.