Morre unha muller en Quiroga ao chocar o coche no que viaxaba cun camión

Unha muller morreu este mércores pola mañá nun terrible accidente de circulación ao chocar o coche no que viaxaba de ocupante contra un camión avariado nunha estrada do municipio lucense de Quiroga, segundo informa o servizo de Urxencias. Na colisión tamén resultou ferido de consideración o condutor do turismo.

O choque produciuse cara ás 10.30 horas no quilómetro 494 da estrada N-120, no lugar de Nocedo, e a causa do accidente o tráfico de vehículos foi interrompido en ambos os sentidos da circulación. O turismo viña desde Monforte.

Segundo informaron fontes do servizo de Urxencias, o vehículo no que circulaban as dúas vítimas impactou contra un camión que se atopaba na estrada debido a unha avaría. O 112 recibiu o aviso do sinistro a través das chamadas de varios particulares que viran o accidente. 

O sinistro tivo lugar nas inmediacións de Quiroga,  xusto antes do centro urbano do municipio. A Central de Urxencias avisou ao 061, Bombeiros de Monforte, o GES de Folgoso e a Garda Civil. Os equipos de intervención tiveron que excarcerar á muller, que faleceu a causa do impacto, mentres que o seu acompañante foi trasladado de urxencia ao centro hospitalario con feridas de consideración.