Un home de 78 anos faleceu na mañá deste martes ao volante dun vehículo que se saíu da estrada no municipio ourensán de Riós. Atendendo aos datos facilitados polo 112 Galicia, o sinistro tivo lugar sobre as 9.33 horas no quilómetro 151 da estrada N-525 ao seu paso pola zona das Ferreiras.
A TVG informou de que o equipo de atestados está a realizar unha investigación para saber se o home morreu como consecuencia do accidente ou se foi por causas naturais previas á saída de vía, algo que se determinará coa autopsia.
O condutor quedou atrapado no vehículo, que acabou nunha cuneta, o que levou a mobilizar aos Bombeiros de Verín, que procederon a excarceralo. Ademais, alertouse a Urxencias Sanitarias de Galicia-061, o Ges da Gudiña, Garda Civil de Tráfico e a Policía Local.
Tamén este martes tivo que ser liberada do interior dun turismo accidentado outra persoa en Camariñas. O sinistro ocorreu sobre as 11.15 horas e acabou co turismo chocando cunha casa no lugar de Camelle. A gravidade da situación levou a mobilizar o helicóptero medicalizado con base en Santiago.
