Venres negro nas estradas de Pontevedra, cun mozo morto nun accidente rexistrado no Salnés e outro nun choque en Vilaboa.
No primeiro deles, un mozo de 19 anos faleceu nunha saída de vía na N-640, á altura da rotonda de Godos, na intersección dos municipios de Caldas, Vilanova e Vilagarcía de Arousa.
A vítima era natural de Valga pero residía en Meis. Foron mobilizados efectivos de Emerxencias de Vilagarcía, unha ambulancia e a Garda Civil de tráfico.
O vehículo saíu da vía por causas que se descoñecen e precipitouse polo desnivel. O condutor e único ocupante foi achado fóra do coche por Emerxencias Vilagarcía con "lesións incompatibles coa vida". Á súa chegada, os servizos médicos só puideron confirmar a morte.
VILABOA. No segundo accidente, ocorrido ao mediodía en Vilaboa, na N-544, faleceu un mozo de 22 anos que viaxaba con outros tres de 21 e 22 anos, que tamén resultaron feridos. Foron trasladados ao Hospital Montecelo.
Circulaban nun turismo BMW en dirección Pontevedra cando, ao cruzarse cun camión marca Mercedes que ía sen carga polo carril contrario, a parte traseira deste desprazouse lateralmente invadindo o carril contrario e impactando co turismo. O condutor do camión resultou ileso.
Como consecuencia do choque o coche quedou gravemente deformado e os ferros causaron lesións de maior gravidade ao ocupante do asento traseiro esquerdo, que foi quen finalmente morreu, e ao condutor.
Ao punto acudiron os Bombeiros do Morrazo, que tiveron que realizar unha laboriosa excarceración, ademais da ambulancia medicalizada do 061, que mesmo valorou a posibilidade de reclamar a presenza dun helicóptero, aínda que, finalmente, esta descartouse. Tamén Tráfico e Protección Civil cooperaron nas tarefas de auxilio.
Precisamente os voluntarios locais explicaron que os dous mozos ao lado dereito saíron polo seu propio pé, mentres que o condutor e o ferido máis grave necesitaron ser excarcerados. O condutor, en principio, non presentaba lesións que fixesen temer pola súa vida. O outro mozo, que faleceu, si presentaba lesións moi graves e foi derivado ao Hospital Álvaro Cunqueiro.
