A nena de 7 anos achada morta na súa cama, en Muimenta, o pasado venres, presentaba lesións na boca e o pescozo, moi pequenas, pero que poderían ser compatibles cunha asfixia mecánica exercida con algunha peza de roupa ou cunha almofada. De feito, a causa do falecemento foi unha parada respiratoria, que en principio non se atribuíu a elementos externos, pero que agora tras a realización da autopsia crese que si puideron ser determinantes.
Polo momento, segue o segredo sumarial e a Garda Civil non ten orde de practicar ningunha detención, mentres a nai da pequena segue hospitalizada en Psiquiatría do Hula, unha unidade pechada onde os enfermos non poden saír. Ademais está sedada.
A investigación tamén recolleu da habitación un pixama da nai, con manchas de sangue, que fora ocultado debaixo da cama. A principal hipótese nestes momentos sobre a causa da morte é que influísen tanto uns fármacos achados no seu organismo como a asfixia. As feridas na cara non se consideraron “signos de violencia” nun primeiro momento, con todo agora cobran especial importancia dado que a causa do falecemento sería a falta de osíxeno.
Muimenta segue conmocionada por este caso e os veciños continúan estupefactos ante as poucas noticias que se revelan da autopsia.
