Os incendios en Galicia, con máis de 9.000 hectáreas calcinadas, remiten e non hai nestes momentos ningún activo logo dos importantes danos rexistrados por mor da decena de lumes que afectaban estes días á provincia de Ourense e que se atopan xa estabilizados ou controlados.
Segundo os últimos datos facilitados pola Consellería do Medio Rural, os dous incendios que continuaban activos, nos municipios ourensáns de Lobios e en Muíños, ambos dentro do Parque Natural do Xurés, atópanse estabilizados.
O primeiro deles, o de Lobios, que arrincou ás 19,40 horas deste sábado, na parroquia de Río Caldo, atópase estabilizado e afecta a unha superficie provisional de 2.000 hectáreas, todas elas dentro do Parque Natural Baixa Limia-Serra do Xurés.
Pola súa banda, un segundo incendio rexistrado esta madrugada proveniente de Portugal tamén no Xurés, en concreto en Prado de Limia, en Muíños, tamén puido ser estabilizado (quere dicir que pode haber chama pero non avanza) tras aceptar a unhas 150 hectáreas.
No que respecta ao resto de incendios, seguen estabilizados os de Vilariño de Conso-Sabuguido (700 hectáreas), Chandrexa de Queixa-Queixa (500 ha), Manzaneda-Cernado (850 ha), Manzaneda-Paradela (400 ha), A Mezquita-Cádavos (450 ha), Rairiz de Veiga- Sabariz (300 ha) e Montederramo-Gabín (30 ha).
Doutra banda, atópanse controlados os lumes de Vilar de Barrio-Rebordechau (700 ha), Cualedro- Montes (un de 1.300 ha e outro de 80 ha), A Pobra de Trives-Pena Petada (50 ha) e Muíños-Requiás (11 ha non Parque do Xurés).
