O anticiclón manda en Galicia, onde este luns xa se alcanzaron os 18 graos de máxima.
As temperaturas primaverais continuarán ao longo de toda a semana, chegando incluso ata os 19 graos este martes en Vigo e, o mércores, tamén en Ourense e Pontevedra.
Con todo, os ceos despexados fixeron que se rexistrasen fortes xeadas pola noite, propias do mes de febreiro, e os termómetros marcasen este luns valores negativos nas provincias de Ourense, Lugo e A Coruña. Así, as mínimas baixaron ata os -6 graos na cabeza de Manzaneda, a -3,8 en Calvos de Randín, -2,4 en Cervantes ou ata o -1 grao rexistrado en Castro de Rei e Zas.
Para o martes, segundo a previsión de Meteogalicia, espéranse nubes de tipo alto pola mañá, que darán paso a un día asollado. As mínimas serán baixas pero as máximas volverán ascender grazas, en parte, aos ventos do sueste. Unha situación moi similar á que se espera o mércores, cando poderían recuperarse os valores mínimos, con ventos de compoñente sur e ceos, en xeral, despexados. O xoves mandarán de novo os ventos do sur e non se esperan grandes cambios nas temperaturas.
Deste xeito, prevese que a influencia anticiclónica se manteña, polo menos ata o sábado, cando podería aparecer máis nebulosidade e descender, lixeiramente, as temperaturas máximas. Aínda así, a previsión non contempla a chegada de choivas ata o vindeiro luns, 18 de febreiro.
