O número de casos activos de coronavirus en Galicia aumentou ata os 196, dezaseis máis que os notificados o venres pola Dirección Xeral de Saúde Pública da Consellería de Sanidade. Do total de casos, 52 son da área da Coruña, 80 da de Lugo, 6 da de Ourense, 15 da área de Pontevedra, 32 da de Vigo, 11 da de Santiago, e ningún da área de Ferrol.
Un dos pacientes positivos atópase en Uci, 10 en unidades de hospitalización e 185 no domicilio. Ata agora, en Galicia hai un total de 11.211 persoas curadas e rexistráronse 619 falecementos. A cifra de mortes por coronavirus permanece sen variación desde o 10 de xuño.
O número de probas PCR realizadas para detectar a infección por Covid é de 241.712.