O presidente da Xunta e líder do PPdeG, Alberto Núñez Feijóo, asegurou este xoves que, "neste momento", cre que descartaría optar á presidencia do PP, do mesmo xeito que xa fixo en xuño do ano pasado. Preguntado nunha entrevista no programa Más de uno de Onda Cero por se considera que o tren de optar a liderar o Partido Popular xa é pasado, se descarta absolutamente ser presidente do partido ou candidato á presidencia do Goberno, Núñez Feijóo respondeu: "Creo que si, descartamos. Isto non é depende, é a miña opinión que lla acabo de dar neste momento", resolveu. Foi no tramo final da entrevista, nunha pregunta de resposta si ou non.
Preguntado polo liderado de Pablo Casado e polas consecuencias da derrota nos xenerais, Núñez Feijóo dixo que non advirte "ningún movemento interno no PP" senón que detecta "unha enorme decepción" polo resultado e tamén "unhas enormes ganas de volver gañar". "Neste momento sería un grave erro empezar a diseccionar as vísceras do que ocorreu cando o que hai que facer é remontar o resultado", remarcou.
O líder dos populares galegos non contempla "neste momento" dar o salto a Madrid
Previamente, Núñez Feijóo insistira nos erros de estratexia do PP durante a campaña electoral das eleccións xerais nas que o seu partido tivo un resultado "moi grave", xa que perdeu máis da metade de escanos. Repreguntado por eses erros, aos que aludira vagamente durante a entrevista, sinalou como un concreto poder facer crer ao seu electorado que formarían un goberno con VOX.
Outro, recoñeceu, foi "regalar espazo" a Ciudadanos ao recoñecelos como unha forza de centro esquerda, xa que o PP é un partido moi amplo no que tamén terían cabida eses votantes, do mesmo xeito que os reformistas, os liberais e os conservadores. E ademais, sinalou, tamén está o tema das mensaxes, xa que na súa opinión o partido non soubo facer fincapé e convencer aos votantes das súas fortalezas, como a xestión económica, como se demostrou durante os mandatos de José María Aznar e Mariano Rajoy, indicou.
Cre que a clave dos comicios deste mes é conseguir unir "o voto dos dez millóns de españois" que non queren un goberno de Sánchez e os "populistas"
Cuestionado sobre a "foto de Colón" e preguntado se foi un erro, Núñez Feijóo tardou uns segundos en contestar e finalmente, tras uns segundos de silencio, tirou de tópicos: "Os galegos temos unha resposta categórica... Depende".
En calquera caso, Núñez Feijóo aprazou a xuño facer todos os exames que fagan falta sobre o resultado electoral dos xenerais, xa que o partido está agora centrado na "remontada" e en obter un "bo resultado" nas municipais, autonómicas e europeas do 26 de maio.
Para o presidente galego, a clave dos comicios deste mes é conseguir unir "o voto dos dez millóns de españois" que non queren un goberno de Pedro Sánchez e os "populistas". Unha vez coñecido ese resultado, que o presidente galego agarda que sexa bo, poderanse facer todos os exames precisos sobre que ocorreu o 28 de abril, insistiu.
Na entrevista, ademais, Núñez Feijóo avogou por facer do Senado a cámara na que se debatan temas que afectan a todos os españois, como educación ou sanidade, directamente con quen teñen as competencias, que son as comunidades autónomas. "(O Senado) non estivo aproveitado e as comunidades autónomas ás veces estiveron desatendidas e tratadas con certa desconfianza polo Goberno cara aos seus presidentes", asegurou.
