O Diario Oficial de Galicia (DOG) publica este luns o plan de formación continua da Academia Galega de Seguridade Pública (AGASP) para o persoal da policía local e que se impartirá durante o último cuadrimestre do ano.
O plan de formación inclúe 42 actividades, preto de 700 horas de formación e máis de 900 prazas. Durante os próximos meses impartiranse cursos en materias comúns, como tráfico e seguridade viaria, pero tamén novidades como formación relacionada cos vehículos de mobilidade persoal (os patíns) ou a investigación de atropelos.
Ademais, o Plan de formación inclúe dous cursos superiores: un en materia de urbanismo, medio ambiente e protección do patrimonio, e outro de actuación práctica ante os tribunais. Neste último cuadrimestre trataranse por vez primeira materias como aporofobia (neoloxismo que dá nome ao medo, rexeitamento ou aversión aos pobres), o edanismo (actitudes e prexuízos asociados ás persoas maiores) ou os métodos de intervención policial en trastornos de desenvolvemento infantil. En setembro presentarase a formación específica en materia de violencia de xénero, un plan no que a AGASP descentraliza toda a súa formación a todas as xefaturas e concellos con policía local co obxectivo de levar os coñecementos ao 100 % dos profesionais que traballan en Galicia.