A área sanitaria de Ourense, Verín e Valdeorras superou a barreira do milleiro de casos activos pola covid-19, con 1.037, pese ao endurecemento das medidas determinado polo comité clínico que asesora á Xunta para tratar de conter a alta propagación da pandemia.
Esta zona, segundo o balance facilitado pola Consellería de Sanidade, rexistrou en vinte e catro horas 91 novos casos, con especial incidencia na capital provincial.
Lugo sumou dous casos, ata os 495; A Coruña sumou un máis, respecto ao domingo, ata un total de 820; e Ferrol, outro, ata os 117.
O resto experimentaron descensos, o maior en Vigo, con 26 casos menos, ata os 419. Pontevedra baixou catro (685 é a cifra actual) e Santiago de Compostela dúas (quedouse en 528).
Do total de pacientes, 37 están na Uci (un máis), 204 en unidades de hospitalización (doce máis) e 3.860 no seu domicilio.
O servizo galego de saúde indica que en Galicia hai 20.170 persoas curadas e os falecementos mantéñense en 757.O número de PCR realizadas é de 511.007. Nas residencias de maiores, son 308 os usuarios contaxiados e 133 os profesionais.
