A Delegación do Goberno para a Violencia de Xénero confirmou que a morte dunha muller na Coruña, cuxo marido, de 54 anos, confesou nunha chamada telefónica que fora el quen a matara, é "un crime machista". Así o asegurou o delegado do Goberno en Galicia, Javier Losada, que este xoves pola mañá participou nun acto en Sarria.
A pesar de que desde primeira hora a policía activou o protocolo de violencia machista, fontes próximas á investigación aseguraban que non se descartaban outras opcións, como as do suicidio asistido, xa que a muller, María Judite Martins Alves, sufría unha enfermidade grave. A morte produciuse por unha arma branca e fontes próximas á investigación confirmaron que no domicilio non se atoparon outros signos de violencia.
Os feitos producíronse o mércores ao redor das sete da tarde na céntrica rúa da Estrella da Coruña; foi o propio marido da vítima quen realizou a chamada á policía na que aseguraba que acababa de matar á súa muller, de 57 anos.
O presunto autor do crime, tras ser detido, foi conducido ao hospital onde permaneceu á espera dunha valoración por parte do persoal médico; de momento aínda non pasou a disposición xudicial.
Javier Losada convocou un acto de repulsa e protesta e de solidariedade coa familia para este venres ás 10.15 horas fronte á Delegación do Goberno en Galicia.
Tras esta confirmación, son 22 as mulleres que foron asasinadas no que vai de ano en crimes de violencia machista, que se cobraron tamén a vida dun menor e deixaron orfos a outros catorce. Segundo datos do Ministerio de Igualdade, este mes de xullo cinco mulleres morreron a mans das súas parellas ou exparellas, igualando a cifra total de mortas ao longo do mes de xuño, ata a data o máis tráxico deste ano.
Fontes da Delegación do Goberno confirmaron que non constaban denuncias previas da muller contra o marido.
