Sete persoas resultaron feridas de carácter leve nun accidente protagonizado por un autobús esta noite na rúa Afonso XIII de Vigo, ao seu paso por baixo da ponte de acceso á autoestrada AP-9. Todos os lesionados foron dados de alta, segundo fontes do hospital Fátima consultadas por EFE.
Os feridos comezaron a chegar sobre as 22:00 horas a este centro hospitalario e, debido ao carácter das súas lesións, de entidade menor, foron dadas de alta ao pouco tempo. Ao parecer, o condutor do autobús non fixo caso dos sinais ou non as detectou e intentou pasar por baixo dunha ponte polo que non cabía, ao superar as dimensións máximas permitidas, segundo explicaron fontes policiais. Non é a primeira vez que autobuses ou camións quedan atrapados neste punto pensando que poden pasar por baixo do paso elevado situado na rúa Lepanto. O accidente deste autocar, que transportaba viaxeiros procedentes de Burgos e sufriu varios danos materiais, ocasionou numerosos atascos na contorna da rúa Afonso XIII.
