A presa independentista María Osorio, natural de Becerreá, sairá en liberdade o próximo 7 de setembro tras cumprir case seis anos de prisión.
Clasificada como FIES-3 –presos vinculados a bandas armadas–, Osorio, de 31 anos, pasou por diversos cárceres españois nos últimos anos, unha situación de "dispersión" denunciada por varios colectivos en defensa dos presos independentistas galegos e pola eurodeputada Lidia Senra, entre outros políticos.
Osorio, xunto á súa parella Antón Santos, a Eduardo Vigo e a Roberto Rodríguez Fiallega, foron os primeiros condenados por formar parte de Resistencia Galega, un grupo considerado terrorista pola Xustiza española.
A militante galega Maria Osório recupera a sua liberdade na próxima sexta-feira 7 de setembro e retorna para o País após quase 6 anos de prisom, regime FIES-3 e aplicaçom da dispersom penitenciária ilegal. Bem-vinda à Terra, Maria!!! pic.twitter.com/Qo6D5tYXHA
— Causa Galiza (@CausaGaliza) 31 de agosto de 2018
A Audiencia Nacional decretou penas de dez anos para a lucense e o seu compañeiro, e de 18 para os outros dous, que sumaron o delito de tenencia de explosivos con fins terroristas aos de pertenza ao grupo e falsificación de documentos.
Con todo, en abril de 2014 o Supremo rebaixou as penas —a trece anos para estes últimos e a sete para Osorio e Santos— por non estar adecuadamente motivadas. Entendeu o tribunal que os recorrentes carecían de antecedentes e que a organización á que pertencen estaba en fase "incipiente" e tiña "unha incidencia limitada" na sociedade.
Tras esta resolución, Osorio, que cumprira máis dun ano en prisión preventiva tras a súa detención en Lugo en decembro de 2011, debía regresar ao cárcere, pero o non fixo.
Estivo un tempo na clandestinidade e en maio de 2014, tras ser posta en busca e captura, realizou unha videoconferencia pública na que anunciou que non se presentaría no cárcere para o cumprimento da condena. Un mes despois foi detida en Ponferrada.
