Os postos da festa do San Roque vigués abriron na mañá deste xoves e xa funcionan con total normalidade despois de que a comisión de festas entregase o plan de evacuación necesario para levar a cabo esta actividade.
A Policía Local de Vigo mantivera pechadas as atraccións durante a xornada do mércores pola falta deste documento, nunha decisión que podería estar relacionada cunha maior atención por parte das autoridades respecto da seguridade do público tras o accidente ocorrido durante o festival do Marisquiño.
Cabe destacar que a prohibición soamente afectou a aqueles postos situados fóra da leira de San Roque, xa que o interior é de propiedade privada –concretamente pertence a Abanca–.
