Unha profunda borrasca traerá choiva e vento para arrincar a fin de semana
O litoral galego está este xoves en alerta amarela por ondas de catro a cinco metros
Unha profunda borrasca deixará este venres fortes ventos en puntos do litoral e zonas altas do interior de Galicia e choivas persistentes en boa parte da comunidade, segundo Meteogalicia.
Este xoves todo o litoral galego está en alerta amarela por ondas de catro a cinco metros e o venres A Mariña luguesa tamén terá este aviso por ventos fortes con refachos superiores que poden superar os 80 quilómetros por hora.
Deste xeito, entre as 12.00 e as 18.00 horas deste venres estará activado o aviso amarelo por refachos máximos de vento superiores aos 80 quilómetros por hora na Mariña.
Ademais, por vento no mar a partir das 9.00 horas haberá aviso amarelo no noroeste da Coruña por vento do suroeste, forza 7, especialmente entre Ferrol e Bares. Así mesmo, entre as 9.00 e as 21.00 horas deste venres tamén o aviso será amarelo na Costa da Morte por vento no mar do suroeste, forza 7.