O PSdeG e o BNG anunciaron que rexistrarán iniciativas no Parlamento de Galicia para requirir explicacións á Xunta tras a morte dunha turista o sábado polo desprendemento dunha roca na Praia das Catedrais, no municipio de Ribadeo.
Así, as parlamentarias por Lugo Concepción Burgo, do PSdeG, e Olalla Rodil, do BNG, expresaron publicamente as súas condolencias á familia da moza valisoletana que faleceu tras o desprendemento de pedra o pasado sábado no areal das Catedrais.
Burgo manifestou que no PSdeG vai rexistrar "iniciativas" a este respecto, xa que "non" entenden "por que se produciu unha situación de tal calibre". "Porque os expertos como vimos nos medios de comunicación xa advertían que podía suceder algo semellante, que non existían suficientes garantías sen presupor nada a priori", abundou.
Por iso, insta o Goberno galego a que ofreza "explicacións do que fixo, de como se revisaron eses cantís, e do que se vai facer" no futuro. "Teñen que dar explicacións da súa total ineficacia como vimos esta fin de semana en que, a pesar de todo, seguíronse dando autorizacións para entrar nas Catedrais cando estaba pechada (a praia). Hai moitos puntos por esclarecer neste desgraciado accidente", esgrimiu.
MEDIDAS. Pola súa banda, a parlamentaria do BNG Olalla Rodil tamén avanzou que van rexistrar "preguntas no Parlamento para pedir explicacións á Xunta". "Sobre todo interesarnos polas medidas que se adoptaron nos últimos meses e aquelas que prevén adoptar a partir de agora para garantir a seguridade dos que visitan ese areal e o parque de Augas Santas, sobre todo polos efectos que teñen os temporais sobre ese espazo", explicou.
"Queremos saber se se valorou o risco, se estiveron os técnicos antes de que acontecese ese desgraciado accidente, para ver en que estado estaban os arcos e as covas", indicou.
