Salvamento Marítimo recolleu este venres na Costa da Morte oito pontonas flotantes que perdeu un buque o martes preto das illas Cíes e supuñan un perigo para a navegación ao atoparse á deriva, segundo informou o organismo.
Desde o martes, Salvamento Marítimo estivo a realizar labores de monitorización e procura dos botes con medios aéreos, pero ata este venres non se puideron recuperar debido ao forte temporal que afectou á costa. Tres deles foron trasladados ao porto exterior da Coruña, outros dous a Camariñas, un ao porto de Laxe e outros dous están varados en liña de costa entre Camariñas e Laxe.
Recuperadas en Costa da Morte las 8 pontonas caídas al mar desde el buque Pemba el pasado martes. Salvamento Marítimo, CCS #Finisterre, se encargó, desde el primer momento, de labores de localización y seguimiento mediante medios aéreos y emitió radioavisos. #SeguridadNáutica pic.twitter.com/eotDJtNfFM
— SALVAMENTO MARÍTIMO (@salvamentogob) January 17, 2020
Os medios marítimos empregados para a recuperación dos botes foron a Salvamar Betelgeuse, a Salvamar Altair e o buque Don Inda, mentres que algúns foron remolcados por pesqueiros. Debido ao perigo que supuñan para a navegación, as pontonas monitorizáronse mediante unha radiobaliza e emitíronse avisos aos navegantes.
O buque mercante Pemba avisou o martes a Salvamento Marítimo de que perdera as oito pontonas que levaba na superficie a unhas 40 millas ao oeste de Cíes.
