A Garda Civil investiga un veciño de Ames que tiña a catro cans de raza American Staffordshire Terrier en condicións deplorables. Os animais, tres cachorros e un adulto, presentaban un avanzado estado de desnutrición e deshidratación ao privalos de líquidos e alimentos en época de altas temperaturas.
A Benemérita acudiu ao lugar acompañada dun veterinario que certificou que os catro cánidos requirían con urxencia coidados hixiénico - sanitarios e alimentación para evitar a súa morte por inanición ou deshidratación.
Da extrema delgadez e dos problemas de saúde dos canes dedúcese a falta de custodia e atención do investigado, que ademais de pór en risco a vida dos cans, abriu a porta á posible xeración dun problema sanitario no lugar. O Seprona recorda que para pór en coñecemento os casos de malos tratos ou abandono animal está dispoñible o teléfono 062 ou o correo electrónico [email protected].
