Axentes da Garda Civil de Pontevedra rescataron a tres mulleres de nacionalidade venezolana que foran enganadas para viaxar a España a exercer a prostitución.
O operativo, presentado na mañá deste venres pola subdelegada do Goberno, Maica Larriba, e o coronel da Garda Civil, Jorge González Veiga, incluíu a detención do dono do club Pigalle, un veciño de Meis de nacionalidade brasileira que ingresou en prisión.
As vítimas, de entre 18 e 24 anos, eran obrigadas a vender os seus corpos para pagar unha suposta débeda contraída co empresario, que as captou no seu país de orixe dicindo que ían traballar nun hotel.
O labor do EMUME (Equipo de Muller e Menor) da Comandancia resultou básica para o esclarecemento do delito.