A arquitecta Isabel Aguirre de Urcola, a profesora e investigadora María José Alonso, o empresario téxtil Jesús Domínguez, o sacerdote Xesús Mato e os carteiros rurais de Galicia, foron distinguidos coas Medallas Castelao na súa edición correspondente a este ano 2018.
O Goberno galego aprobou, na súa reunión semanal, o decreto polo que se concede esta distinción a aqueles galegos cuxa obra, en calquera faceta de actividade humana, considérase merecedora do recoñecemento de toda Galicia. Como cada ano, serán entregadas o 28 de xuño.
Na rolda de prensa posterior, o presidente galego, Alberto Núñez Feijóo, destacou a traxectoria de Isabel Aguirre de Urcola, María José Alonso e Jesús Domínguez, así como de Xesús Mato, de quen, ademais do seu labor pastoral, recordou que fundou a Polifónica de Lalín e foi tamén cofundador de Fuxan vos Ventos.
Feijóo, quen foi presidente de Correos, destacou tamén a distinción aos máis de 1.000 carteiros rurais que traballan en Galicia e que "reparten cada día en todos os lugares" da comunidade, "por recónditos que sexan".
