O Servizo Galego de Saúde (Sergas) trasladou este venres aos sindicatos a súa predisposición a atender a súa proposta de implantar un sistema de gardas localizadas nos puntos de atención continuada (PAC) para a cobertura de ausencias imprevistas que poidan xurdir as fins de semana e días festivos.
No marco da mesa sectorial, a administración sanitaria galega tamén expresou a súa intención de atender outras reivindicacións dos profesionais, como o pago da dobre dieta os domingos e festivos ou o establecemento dunha uniformidade común en todos os PAC de Galicia, informa nunha nota.
Sergas e sindicatos acordaron que a selección temporal de persoal facultativo de especialistas de área se realice a través das listas de contratación. Así pois, aplicarase un sistema de selección que terá en conta a nota das oposicións e a acreditación de méritos, como os servizos prestados e a formación e investigación.
Tamén houbo acordo sobre a flexibilización para todo o persoal estatutario do goce dos días de libre disposición correspondentes a 2018 ata o 31 de marzo de 2019.
Finalmente, administración e sindicatos pecharon a negociación dos proxectos de ordes que permitirán a integración ao réxime estatutario de persoal laboral de entidades públicas adscritas á Consellería de Sanidade e de persoal funcionario laboral dos hospitais do Sergas.
A integración efectiva deste persoal permite que poida acceder ao sistema de carreira profesional ordinaria do Sergas.
