Representantes do Sindicato Labrego Galego reuníronse este mércores en Santiago coa valedora do Pobo, Milagos Otero, para denunciar a "indefensión" e "desamparo" que sofren as granxas galegas polos "continuos ataques da fauna salvaxe e polo abandono de funcións da Xunta de Galicia ante esta problemática".
En concreto, Milagres Otero recibiu á secretaria xeral do sindicato, Isabel Vilalba Seivane; ao responsable do sector de Vacún de Carne, Lois Varela; e, por parte da Dirección de Leite, á súa coordinadora, Lupe Prado, e a Eliseo Cebreiro.
En declaracións á prensa, a secretaria xeral do SLG criticou a "indefensión" das granxas ante os ataques de fauna salvaxe, unha competencia que é da Xunta, que "ten o deber de xestionar as poboacións das distintas especies" e é, entenden", a responsable civil subsidiaria dos danos que estas causan".
"Lonxe disto, a Xunta non asume ningunha das súas competencias e deberes neste tema e as poboacións de especies como o xabaril campan totalmente descontroladas, cada vez máis numerosas, e facendo estragos en pastos e cultivos como o millo ou a pataca", criticou Isabel Vilalba.
O SLG entende que as perdas ocasionadas por ataques da fauna salvaxe "non poden recaer só nas granxas atacadas, senón que deben ser asumidas polo conxunto da sociedade".
"Se un animal das nosas granxas causa algún dano, nós temos que asumir esa responsabilidade. En Castela e León, por exemplo, hai sentenzas que din que a Xunta é a responsable civil deses danos. No caso galego, a día de hoxe, só existen unhas axudas moi deficientes para cubrir os danos causados polo lobo, xa que son manifestamente pequenas, poden tardar máis de tres anos en facer o ingreso e, ultimamente, sabemos de varios casos nos que chamas para denunciar e ninguén acode para levantar acta dos danos", criticou a secretaria xeral.
Isabel Vilalba alertou sobre que, máis aló dos danos materiais causados, tamén existe unha "seria ameaza sanitaria". Neste sentido, recordou que, en Bélxica, declarouse un brote de peste porcina africana transmitida por xabarís, que obrigará ao sacrificio de 4.000 porcos.
