A xuíza da Audiencia Nacional Carmen Lamela enviou a prisión sen fianza ao histórico narcotraficante José Ramón Prado Bugallo, Sito Miñanco, e a outros 20 presuntos membros da súa banda detidos o pasado luns na operación Mito.
A maxistrada deixou en liberdade a outros nove arrestados con medidas cautelares, segundo informaron fontes da Audiencia Nacional, que indicaron que se lles imputan os delitos de tráfico de drogas, branqueo e pertenza a organización criminal de extrema gravidade.
ACUSADOS. Sito Miñanco pasou este mércores a disposición xudicial da Audiencia Nacional xunto a outros 29 detidos este luns na operación Mito.
Aconsellado polo seu letrado, o histórico narco acolleuse ao seu dereito a non declarar como así fixeron a gran maioría dos arrestados.
Segundo as fontes, a Fiscalía pediu o ingreso en prisión da maioría por "feitos graves" mentres que para algúns solicitou a liberdade con medidas cautelares, entre elas, a retirada do pasaporte, prohibición de saír de España e comparecencias no xulgado.
Entre os detidos atópase tamén unha filla de Sito Miñanco, o seu lugartenente Enrique García Arango, o capo Ramiro Somoza e David Pérez Lago, fillastro doutro histórico capo do narcotráfico galego, Laureano Oubiña.
OPERACIÓN MITO. Miñanco, de 62 anos, máis de 20 deles pasados en prisión, estaba en semiliberdade desde abril de 2015 e traballaba como responsable de seguridade dunha empresa de aparcadoiros en Alxeciras cando foi detido.
Esta organización estaba a ser investigada desde 2016, pouco despois de que Miñanco comezase a gozar dos seus beneficios penais, que lle permitían durmir diariamente no Centro de Inserción Social (CIS) de Alxeciras (Cádiz).
A operación, con arrestos en Madrid, Galicia e Málaga, saldouse con tres axentes feridos, dous deles do Grupo Especial de Operacións (GEO), cando entraron nunha nave dun club de tiro de Alpedrete, no partido xudicial de Collado Villalba (Madrid).
Os investigadores sospeitan que a banda se dedicaba a introducir cocaína en España e a blanquear diñeiro, e segundo un dos autos de entrada e rexistro, ao que tivo acceso Efe, responsabilízase a esta organización de tres alixos que suman en total máis de 4 toneladas de cocaína e 63 quilos de marihuana, aprehendidos noutras tantas operacións contra o narcotráfico desenvolvidas en distintos países en 2017.
