José Manuel Pérez, coñecido como Josito, explicou este xoves pola mañá que a súa candidatura á secretaría xeral de Podemos Galicia conta cos avais necesarios e que, desde hai días, está practicamente pechada. Con todo, xustificou a decisión de suspender a súa presentación, que estaba prevista para este xoves en Lugo, nas conversacións que o seu equipo mantén coas outras dúas candidaturas –Antón Gómez-Reino e Carolina Bescansa– en aras dunha lista e un proxecto de unidade.
Pérez sinala que o proceso de renovación que vive neste momento Podemos Galicia foi impulsado por el "e moitos outros militantes" de todo o territorio galego hai case un ano.
Este recalcou que toda a documentación necesaria para iniciar o proceso está presentada desde decembro do ano pasado, pero que o equipo da actual secretaria, Carmen Santos, que non opta á reelección, o foi demorando ata agora. Pérez asegura que ese movemento é "basicamente da militancia" e "bastante plural", xa que aúna a xente de todas partes da comunidade e de distintas xeracións e sensibilidades, di.
Pérez aprecia que nas tres vías que optan a liderar Podemos Galicia hai "xente con predisposición" a confeccionar unha candidatura e un proxecto de unidade, pero admite que tamén hai moitas resistencias e diferenzas e que as negociacións están a ser "moi duras". Os obxectivos da súa candidatura son dotar ao partido dunha estrutura potente, onde domine o discurso sobre o proxecto de cambio que necesita Galicia no canto de sobre as diferenzas persoais ou organizativas. Tamén ve necesario dar máis protagonismo á militancia.
