Un temporal castigará desde este venres a case toda Galicia e sentirase especialmente na Costa da Morte, o noroeste da Coruña e a Mariña luguesa, onde se esperan ondas de ata seis metros de altura e decretouse o nivel laranxa de alerta —o segundo máis alto nunha escala de tres— desde as 18.00 horas do venres. Un fenómeno meteorolóxico costeiro que afectará tamén, aínda que en menor medida, ás Rías Baixas, onde o mar estará igualmente embravecido, pero as ondas moveranse entre os catro e os cinco metros, polo que a alarma sitúase no nivel amarelo, máis baixo.
En calquera caso, os servizos de urxencias e autoridades de deputacións, municipios, portos e os voluntarios de Protección Civil xa recibiron o aviso para extremar as precaucións e a Xunta invitou tanto ás autoridades como á poboación en xeral a adoptar medidas para garantir a seguridade da poboación. E é que este venres estará pasado por auga en toda a comunidade, pero a situación empeorará co inicio da fin de semana debido ao vento, que suporá unha ameaza engadida desde o sábado.
Así, pola tarde espéranse refachos de máis de 70-80 quilómetros por hora no centro de Lugo, A Mariña, a montaña lucense, o litoral e o interior de Pontevedra, a montaña ourensá e toda a provincia da Coruña. É dicir, que practicamente toda Galicia estará en alerta amarela e soprarán fortes refachos tanto en terra como no mar.
En canto ás precipitacións, que serán unha constante nunha fin de semana pasada por auga, castigarán con especial virulencia o oeste e sur da Coruña, en alerta amarela por choivas que superarán os 40 litros por metro cadrado en 12 horas. E todo apunta a que o chuvasqueiro e as katiuskas seguirán sendo necesarios a semana que vén, porque a borrasca seguirá o luns e martes, segundo a previsión a medio prazo de Meteogalicia.
Un temporal de choiva e vento sitúa a Galicia en alerta esta fin de semana
Espéranse ondas de ata seis metros de altura no litoral da Coruña, a mariña lucense e as rías Baixas
