A incomparecencia de tres dos irmáns de Sinaí Giménez provocou unha fervenza de decisións xudiciais este martes no proceso que se segue en Pontevedra contra a cúpula dos Morones. O titular do Xulgado do Penal 1, Juan José Trashorras, ordenou a detención inmediata de Juan Paulo e de Marino Giménez, ambos por non acudir ao xuízo, e a revisión médica de Consuelo, cuxo letrado alegou problemas de saúde que serán verificados ao longo deste martes.
O maxistrado tomou esa decisión tras a solicitude da Fiscalía, que se viu obrigada a pedir o adiamento da vista ante as citadas ausencias.
Os Morones enfróntanse a penas que suman máis de 30 anos de cárcere por unha suposta malleira a un avogado e agresións a gardas civís ás portas dos xulgados de Tui.
A sala fixou o xuízo para os próximos 16 e 17 de outubro.
En canto ao proceso previsto para a semana próxima pola pelexa entre Morones e Zamoranos no mercadillo de Cangas, terá lugar a partir do luns no mesmo edificio xudicial pontevedrés.
A convocatoria do xuízo deste martes reuniu unha gran cantidade de medios de comunicación, ante os que Sinaí Giménez asegurou que "a presión mediática aguántoa perfectamente". En declaracións recollidas por Europa Press, asegurou que estaban "todos tranquilos". "Porque sei que nada do que se di é certo", abundou.
O xuízo levou a organizar un amplo despregamento de seguridade con ao redor de 20 axentes, tres furgóns e dúas dotacións da Policía Nacional.
