O xuízo contra Unión Fenosa Distribución e Gas Natural (actualmente unidos baixo a marca Naturgy) no Xulgado do Mercantil número 1 da Coruña por non medir o consumo real dos contadores eléctricos e emitir as facturas en base a estimacións quedou este luns visto para sentenza.
A acusación, o Ministerio Fiscal, acusou a Naturgy de levar ao cabo unha práctica "ilícita e abusiva" a través dunha demanda colectiva na que recolleu doce casos, oito rexistrados na Oficina Municipal de Atención ao Consumidor do Concello da Coruña e catro no Instituto Galego de Consumo entre febreiro de 2016 e xuño de 2018.
"Demostrouse que, de forma reiterada, están a realizarse facturas en base ao consumo estimado e non en base ao consumo real, como esixe a normativa reguladora dos dereitos dos consumidores", apuntou o fiscal responsable do caso, Juan Aguirre Seoane, durante a celebración da vista.
A acusación sostivo que esta práctica "non é consentida" e, ademais, sería "contraria ás esixencias da boa fe", xa que a parte acusada "representa a unha empresa líder no sector" e que, polo tanto, "disporía dos medios suficientes para cumprir cos estándares esixibles de calidade na medición".
Segundo os datos recollidos polo Ministerio Fiscal, ao termo de 2016 a empresa tería instalados "ao redor de 2,7 millóns de contadores" e estaría a emitir" entre o 7 e o 9 % das súas facturas en base a medicións estimadas", polo que esta práctica "afectaría a 30 millóns de facturas cada ano".
O fiscal asegurou que a empresa tamén estaría a cobrar aos seus clientes o aluguer do contador incluso naqueles meses nos que non se realizaron medicións e se estimou o gasto, o que suporía "un grave prexuízo para os consumidores".
"Estas prácticas afectarían a todo tipo de clientes, independentemente de que o seu contador fose análogico ou intelixente ou de que tivesen tarifa plana ou de mercado libre", concluíu o representante do Ministerio Fiscal.
Por outra banda, a acusación denunciou tamén erros de comunicación, xa que, segundo relatou o fiscal, cando os clientes preguntaban á empresa polo porqué da medición do consumo en base a estimacións, Naturgy "tan só respondía que fora imposible tomar a medición real".
En base a estes feitos, o fiscal pediu á xuíza que obrigue á empresa a reverter esta situación e pór fin ás súas causas nun período de tempo determinado e, finalizado este prazo, se lle impoña unha multa de 60.000 por cada día de incumprimento, en caso de habelo.
A defensa, pola súa banda, pediu a comparecencia como testemuña do responsable de Despregamento Equipos de Telegestión de Gas Natural Fenosa, Ángel Javier Martínez Díaz, quen asegurou que "o 98 % das medicións realízanse en base ao consumo real", polo que só o 2 % restante serían emitidas en base a estimacións.
Neste sentido, a testemuña sinalou que a realización de medicións estimadas de consumo realizaríase só en caso de ausencias de lectura que, "no seu maior parte danse por problemas no contador e a súa rede de comunicación, provocados xeralmente pola presenza de ruídos que interferen neste proceso".
Os avogados da defensa apuntaron, á súa vez, que o Ministerio Fiscal "non acreditaría a existencia dunha práctica ilícita e abusiva", xa que "a parte da proba recae sobre a acusación e esta limitouse a documentar doce reclamacións".
Con respecto ás acusacións de non informar debidamente aos consumidores cando estes preguntaron polas incidencias, a defensa asegurou que non existe unha regulación sobre como deben realizarse estas comunicacións.
